Қостанай облысының Әділет департаменті 2024 жылғы жұмыстың қорытындыларын шығарды. Өткен алқалы жиында атқарушылық іс жүргізу және халыққа заңгерлік көмек көрсету саласындағы негізгі жетістіктер мен мәселелер талқыланды.
Жыл бойы облыста жалпы сомасы 260 миллиард теңгеден асатын 346 149 атқарушылық іс жүргізу құжаттары қаралды. Оның 72,4%-ы толық орындалды. Дегенмен алимент өндіру мәселесі өзекті болып қалуда, орындауда 16 068 құжат бар, ал олардың қарызы 1 миллиард теңгеден асады.
– Орындау тиімділігінің төмендеуінің негізгі себептері – борышкерлердің тұрақты жұмыс орнының жоқтығы және табыстарын жасыруына байланысты. Бұл мәселені шешу үшін 2024 жылы алимент өндіру бойынша проблемалық істермен жұмыс алгоритмдері енгізілді. Нәтижесінде, борышкерлерді әкімшілік және қылмыстық жауапкершілікке тарту көрсеткіші 32%-ға артты. Сондай-ақ, алимент борышкерлерін жұмысқа орналастыру үшін жәрмеңкелер өткізіліп, 186 адам жұмысқа орналастырылды, – деп атап өтті Қостанай облысы Әділет департаменті басшысының орынбасары Ельмира Мұхаметқалиева.
2024 жылдың қазан айында ел аумағында электронды сот орындаушысы іске қосылды. Бұл жаңашылдық істерді қарау процесін жылдамдатуға мүмкіндік берді. Қостанай облысында жеңілдетілген тәртіп бойынша 10 501 іс қозғалып, облыс тұрғындарына 6 миллион теңгеден астам қаражат үнемделді. Алайда, Ельмира Мұхаметқалиева атап өткендей, бұл жүйені барлық атқарушылық құжаттарды қамту үшін жетілдіру қажет.
Халыққа заңгерлік көмек
2024 жылы кепілдендірілген мемлекеттік заңгерлік көмек көрсету үшін 155 миллион теңге бөлінді. Бұл 17 630 азаматқа қызмет көрсетуге мүмкіндік берді, бұл 2023 жылмен салыстырғанда 20%-ға артық. Сондай-ақ, «Е-заң көмегі» ақпараттық жүйесі белсенді қолданылып, адвокаттар мен заңгерлік кеңесшілерге қол жеткізуді жеңілдетті.
Жетістіктерге қарамастан, заңгерлік көмектің сапасын қамтамасыз етуде қиындықтар бар. Жыл ішінде департаментке заңгерлердің іс-әрекеттері немесе әрекетсіздігіне байланысты 105 шағым түскен. Сонымен қатар, алименттер мен мемлекеттік кірістерге қатысты борыштарды өндірудің төмен деңгейі мемлекеттік органдардың күш-жігерін шоғырландыруды қажет етеді.
– 2025 жылға арналған басымдықтардың қатарында алименттер бойынша жұмыс тиімділігін арттыру, атқарушылық істердің қалдығын азайту және заңгерлік қызметтерді кеңейту бар. Бұдан бөлек, цифрландыруды дамыту мен ауыл тұрғындарын құқықтық оқытуды күшейту жоспарланып отыр, – деп түйіндеді Қостанай облысы Әділет департаменті басшысының орынбасары Темірбек Нажиканов.
Әділет департаментінің жұмысы заңгерлік көмектің қолжетімділігі мен сапасын арттыруға бағытталған, бұл өз кезегінде облыс тұрғындарының құқықтары мен мүдделерін қорғаудың маңызды элементі болып табылады.
Құқықтық мәдениетті дамыту мәселесі де аса маңызды болып қала береді. Сондықтан заңнаманы түсіндіру мақсатында түрлі іс-шаралар, акциялар, семинарлар, дөңгелек үстелдер және азаматтарды жеке қабылдаулар өткізу жоспарлануда. Заңгерлік көмек адвокаттар мен заңгер-консультанттар арқылы кепілдендірілген мемлекеттік заңгерлік көмек және кешенді әлеуметтік құқықтық көмек шеңберінде көрсетіледі.
Жұмыс сәттерінен бөлек, Әділет департаментінің қызметкерлері мүгедектігі бар тұлғаларға, көпбалалы отбасыларға, балалар үйлеріне, қиын жағдайдағы азаматтарға және басқа да мұқтаж жандарға материалдық және құқықтық көмек көрсету мақсатында қайырымдылық акцияларына белсене қатысады.
Аяжан СЕРІК,
суретті әділет департаменті ұсынды
